香港品牌丹丘蒸留所 首批威士忌料2029年面世 買定唔買？

呢幾年好多人將威士忌當股票，所以我平時都會研究下威士忌投資價值、點玩、點投，而「炒瓶」同「炒桶」，又係2件事。

近2日收到一份資料，講丹丘蒸留所喺北海道蒸餾廠投產。

丹丘蒸留所由香港氈酒「白蘭樹下」團隊創立，於北海道東川町釀造「雪の窓」氈酒及威士忌。呢間位於北海道東川町的蒸餾廠已投產逾一年，係「公設民營」，即係東川町政府出錢起，民間團隊營運。呢種模式喺日本唔多，好處係酒廠唔需要一開始就孭住地產同折舊跑數。

今年佢哋喺英國《The Spirits Business》主辦嘅 The Global Spirits Masters 攞咗四項金獎。兩款「新酒」（New Pot）喺 The World Whisky Masters 2026 獲金，「雪の窓」乾型氈酒同海軍強度氈酒喺 The Gin Masters 2026 獲金。四款參賽，四款金獎。丹丘蒸留所首批單一麥芽威士忌預計於2029年推出。

一間投產一年嘅廠，四款全中，至少說明技術上冇失手。

技術上值得講嘅有幾項：水係入選日本環境省「平成の名水百選」嘅大雪山旭岳伏流水。製程用「麥汁過濾機」，可以用磨得更細嘅麥芽粉，萃取率較高。發酵拉長到 168 小時，分兩段，酵母同乳酸菌有更多時間生成酯類同酸類，所以「新酒」嘅果香比較豐富。蒸餾器係荷蘭 iStill。

來自台灣的丹丘蒸留所首席蒸餾師 David Hsieh 將於10月29日至11月1日首度訪港，於4場品鑑活動中與香港酒友分享蒸餾廠第一年的「新酒」，以及入桶後的熟成進度。David Hsieh係英國赫瑞瓦特大學蒸餾碩士，喺蘇格蘭蒸餾廠做過蒸餾同調和。佢同時主持一個叫《業務用威士忌指南》嘅 Podcast。

David Hsieh指，東川町四季溫差大，橡木桶隨氣溫熱脹冷縮，酒液反覆滲入及滲出木材，與橡木的交換因此比溫差小的產區更為頻繁。這次來香港，希望與酒客一起品嚐『新酒』入桶第一年的變化。

日本業界 2024 年起全面執行新標準，水源、蒸餾、熟成、裝瓶都要喺日本本土完成，先可以叫「日本威士忌」。標準收緊之後，市場上好多「日本威士忌」即刻現形。東川町呢間廠，係由零開始喺日本做出嚟。

丹丘蒸留所同時開放「2027私人原桶」計劃。客人可先在品鑑活動試飲蒸餾廠的「新酒」，再選擇橡木桶。2027年新增的5加侖桶約3年後裝瓶，可得約24瓶，份量適合個人或家庭共享。

1.  5加侖桶（新增）：「新酒」先在前波本美國標準桶（ASB，American Standard Barrel，約200公升）熟成2年半，再移入全新美國橡木5加侖桶（約19公升）陳放半年，合計3年。小容量橡木桶的酒液與木材接觸面積比例較高，萃取速度較快，若全程使用小桶，木質風味容易過重，橡木桶也較易滲漏；因此前2年半先在美國標準桶熟成，最後半年才移入5加侖桶，補足橡木桶風味。每桶HK$24,800，可於香港網上商店直接訂購。

2.  美國標準桶（ASB）：約200公升，可選日本國產大麥麥芽或英國泥煤麥芽「新酒」，已含3年酒窖存放。每桶HK$138,800。

3.  水楢桶（Mizunara Hogshead）：約220公升，2026年入桶，可選日本國產大麥麥芽或英國麥芽「新酒」，已含8年酒窖存放。英國麥芽每桶HK$342,800，日本國產大麥麥芽每桶HK$359,800。

每個橡木桶由蒸餾師團隊於東川町酒窖管理。裝瓶時可加上個人酒標，適用於個人收藏飲用、與親友分享，或作餐廳及酒吧的自家品牌威士忌。

新廠第一批酒，可以係驚喜，都可以係學費。試試再講。