由 516 美元跌到 94 美元 Lululemon 係唔係已經玩完？由一時無兩至跌落神壇 股價分析

眼見尖沙咀K11 Musea又開咗間Alo旗艦店，男男女女於開業頭一個星期，打蛇餅排隊入貨支持，不過作為lululemon嘅真實、忠心、3日唔埋2日就走入鋪頭行個圈嘅用家，反而又想寫吓lululemon呢間公司。

三年前，lululemon 最高見過516美元。今日出稿時約94 美元，市值104.8億。唔夠三年蒸發八成市值。公司舊年仲賺緊錢，收入創新高。股價同業績完全唔相稱，真係因為勁敵迅速崛起？今時今日lululemon到底發生了甚麼事？

lululemon的品牌哲學 如何令用家掛上中產身份標籤

1998年，加拿大裔美國運動教練Chip Wilson 喺溫哥華創立lululemon，起初佢只係一間小型工作室，當時Wilson只係想造一條唔透視、唔起毛粒嘅瑜伽褲（的確，同一條lululemon褲我著咗3年，真係無爛、無毛粒、無縮水，彈性仲Keep到），日間研發，夜晚變身瑜伽教室。Wilson嘅工作室中隨處可以見到激勵人心嘅標語字句，好似係「專注擁有而非失去」、「朋友比金錢更重要」等，Wilson將自我成長、心靈雞湯金句印喺袋上，送俾經過工作室嘅人，傳遞「生活態度」。隨著社交媒體興起及傳播，越來越多人想得到呢個袋，亦於奠定咗Lululemon賣「生活態度」嘅企業文化。

2000年11月，Wilson在溫哥華基斯蘭奴（Kitsilano）開設第一家獨立門市，但真正令佢跑出嘅唔係布料，係社群—Community。Lululemon營銷策略與其他品牌唔同，幾乎不投放大型廣告，佢靠瑜伽導師或KOL合作、門店免費課程、「大使」計劃，一層一層滲透因為口耳相傳比廣告轟炸更具說服力。

Lululemon從一開始就將目標受眾定位在「高淨值」群體，用戶主要係年輕中產階級，或具備一定消費能力嘅用戶，同時製造身份標籤，你著Lululemon就代表有活力、高級、貴價、潮流。瑜伽褲每條售價通常喺HKD$600-1000左右，堅決唔做discount，而呢類消費客群中，消費需求唔容易受到抑制，同時亦更容易為公司收入增長帶來穩定及韌性。

因此你見到佢目標好明確，賣嘅唔係運動服，而係一種生活態度。2007 年，上市。

五年營收由 62 億升到 111 億 點解股價反而跌七成

睇睇佢盤數。明明個品牌做得咁靚，點解股價又會江河日下？

FY2022 營收 62.6 億美元，FY2026 升到 111.0 億，五年升咗七成七。但同期股價跌咗近七成。睇埋增速：+ 42%、+ 30%、+ 19%、+ 10%、+ 4.9%，增速台階式下滑。到 FY2026 第二季，營收更係上市以來首次同比負增長。

46 倍市盈率壓到 7.5 倍，係上市以來最低，市場唔係殺盈利，而係殺增長。

美洲佔 lululemon 收入近七成，係佢嘅命脈。但 FY26 第二季，美洲收入跌 8%，同店銷售跌 12%。最誇張係，由於潮流轉向闊腳褲，佢嘅核心產品瑜伽褲即時變得不合時，招牌緊身褲銷售跌咗兩成。本來都可以靠中國市場頂住，但同一季，中國大陸固定匯率收入跌 2%，同店跌 8%。長城活動嘅負評、天貓 618 唔跟折扣、新品反應差，三件事一齊爆，再加兩副引擎同時死火。古有內憂外患，Lululemon都有。

做折頭竟反噬品牌？

lululemon 最值錢嘅資產，係「唔打折」呢三個字。

但過去幾年，佢常態七折、開outlet，核心單品價格跌到 400 至 500 蚊。一個靠稀缺性立身嘅品牌開始打折，佢賣嘅身份標籤就開始褪色。

外面仲有 Alo Yoga、Vuori、安踏MAIA ACTIVE 前後夾擊。Alo 2026 年 8 月登陸天貓，開店一分鐘成交破一千萬。連創辦人 Chip Wilson 自己都話，公司正喺度「Gap 化」。

最大競爭對手Alo迅速崛起　唔上市反而有助搶市場份額 瑜伽界天花板要被重新定義？

Alo Yoga 由 Danny Harris 同 Marco DeGeorge 喺 2007 年創立，總部位於洛杉磯。至今未上市，母公司 Color Image Apparel 由兩位創辦人各佔一半。

Alo品牌行輕奢路線，主打「Studio-to-Street」美學，設計更注重修飾身形，意旨由「健身房走進餐廳也毫不違和」，Leggings 定價約 HKD$800–1,300。Kendall Jenner、Hailey Bieber 瘋狂著Alo打卡，連 BTS 的 Jin 都親自帶貨，Alo 已成為潮流生活方式的象徵。

Alo母公司在2023年底至2024年初尋求融資，曾向投資機構與私募股權傳出100 億美元估值目標。2026 年 5 月母公司賣走低毛利嘅 Bella+Canvas 業務。6 月外媒報道，Alo 正籌備上市或者整體出售。

2023 年初全球門店唔夠 12 間，2026 年已經超過 150 間，美國直接面向消費者收入 2025 年超過 15 億美元。中國市場方面，2026 年 8 月 12 日天貓旗艦店上線，第一分鐘成交破一千萬人民幣。上海、北京旗艦店排隊等開，又搵 K-pop 女團成員做代言，目標係阿里巴巴 6,200 萬個 88VIP 高消費會員。呢班人，正好就係 lululemon 養大嘅客。

Alo行嘅路線基本上同Lululemon一樣，但與Alo擁有唔同嘅市場策略。Lululemon 靠瑜伽導師同社群滲透，Alo 靠明星同話題搶注意力。市場增長放緩時，注意力就係最貴嘅資源。加上 Alo 未上市，冇季報壓力，可以燒錢搶份額。

Lululemon創辦人是非不絕 為品牌再添壓力

在創立 Lululemon 之前，創辦人Chip Wilson 其實曾擁有一個名為 「Homeless」 的滑板與滑雪服飾品牌。當他準備結束該品牌並將其賣給日本代理商時，發現日本人對這個品牌展現出超乎預期的狂熱，並願意支付極高的價格。這讓他開始研究「點解」日本人對這個名字情有獨鍾？

Wilson 向媒體透露，佢觀察到90年代的日本市場非常崇尚北美與西方文化。然而，由於日語發音（五十音）中並沒有獨立的 "L" 音標，因此日本本土的行銷公司改名時，傾向刻意避開帶有 "L" 的單字。但，如果一個品牌名稱裡含有 "L"，日本人就會覺得「這絕對是北美、不折不扣的正宗西方品牌」，簡稱「來路貨」。Lululemon因此而起，仲要一嚟就整3個L字，作為行銷日本的策略。事件曝光後，結果遭日本網民歧視，揚言拒買，結果他為此公開否認曾有此說法。

2013年，他曾暗諷某些女性肥胖，不宜穿公司旗下的瑜伽褲而招致猛烈抨擊，結果要向員工道歉。

2015年，Wilson離開Lululemon的管理團隊。

7.5 倍市盈率 抵唔抵買？

便宜唔等於抵買。

lululemon仍然賺錢，現金流正，冇債務危機，冇破壞性清倉，價格體系無嚴重問題，但Lululemon問題屬於結構性，唔係週期性。核心市場同店轉負、第二大引擎熄火、競爭格局惡化、品牌定位鬆動，短期睇唔到催化劑。

前 Nike 高管、同時擔任Spotify Technology、Hyatt Hotels以及Lithia & Driveway董事會成員的新 CEO Heidi O'Neill ，9 月 8 號上任，能唔能夠為品牌起死回生呢？Barclays分析師Adrienne Yih表示消息利好，但Lululemon面臨的問題源於一些更具結構性的逆風，預計她對業務的影響將在2027年才會顯現。因此，Barclays預計2026年仍將是該公司的「重整」之年。 Let's see.

快速QA

lululemon 現時股價係幾多？

2026 年 10 月 12 日收市報 94.66 美元，52 周區間介乎 90.38 至 225.98 美元。

lululemon 歷史高位係幾時？

2023 年 12 月 29 日，歷史高位 516.39 美元。

lululemon 業績係唔係已經轉差？

FY2026 營收 111.0 億美元仍創新高，但歸母淨利跌 13%。FY26 第二季營收首次同比負增長，美國同中國同店銷售同步轉負。

lululemon 新 CEO 係邊個？

Heidi O'Neill，前 Nike 高管，2026 年 9 月 8 日正式上任。

Alo Yoga 上市未？

未。Alo Yoga 至今仍然係私人公司，母公司 Color Image Apparel 由兩位創辦人 Danny Harris 同 Marco DeGeorge 各持一半。2026 年 6 月有外媒報道佢正籌備上市或整體出售，市場估值約 100 億美元。

Alo Yoga 點樣搶 lululemon 生意？

靠三招。一，同一個高端定位，直接爭同一批客。二，明星同 K-pop 代言加社交話題，搶注意力。三，數位先行、未上市冇季報壓力，可以用較低前期資本測試市場再燒錢搶份額。